UFC'нинг собиқ чемпиони, ирландиялик Конор Макгрегор олган жароҳати сабаб камида бир йил жанг қилмайди. Бу ҳақда промоушен бош директори Дана Уайт маълум қилди.
Қайд этилишича, 12-июль куни Лас-Вегасда ўтказилган UFC 329 турнирида Макгрегор америкалик Макс Холлоуейга қарши жангда биринчи дақиқадаёқ техник нокаут эвазига мағлуб бўлди. Кейинчалик ирландиялик жангчи сон суягининг бошча қисми жароҳатланганини ва операцияни бошдан кечиришини маълум қилди.
“Биз Макгрегор билан гаплашдик. У бир йилга сафдан чиқди”, дея Дана Уайтнинг сўзларини келтирмоқда MMA Fighting.
Макгрегор Холлоуей билан жангга қадар 2021-йилнинг июльидан бери октагонга кўтарилмаган эди. Ўшанда у америкалик Дастин Порега қарши кечган учрашувда оёғини синдириб олиб, мағлуб бўлганди. Ҳозирга қадар 38 ёшли собиқ чемпион ММА'да 29 та жанг ўтказиб, 22 та ғалаба қозонган, шунингдек, 7 та жангда имкониятни бой берган.
