Тунис футбол федерацияси Муин Шаабани миллий терма жамоа бош мураббийи этиб тайинланганини эълон қилди. Жамоа матбуот хизмати хабарига кўра, томонлар 4 йиллик шартнома имзолаган.

45 ёшли мутахассис Африка футболида янги авлоднинг энг муваффақиятли мураббийларидан бири ҳисобланади. Шаабани «Эсперанс» клуби бошқарувида 2018 ва 2019 йилларда кетма-кет икки марта Африка Чемпионлар лигасида ғолиб чиққан, шунингдек, ушбу жамоа билан уч марта Тунис чемпионлигини қўлга киритган.

Мураббий охирги икки ярим йил давомида Марокашнинг «РС Беркан» клубида ишлади. Унинг қўл остида жамоа ўз тарихида илк бор мамлакат чемпиони бўлди, 2024/25 йилги мавсумда эса КАФ Конфедерация кубогини қўлга киритди. Ўша мавсум якунларига кўра, Шаабани Марокашнинг энг яхши мураббийи деб тан олинган эди.

Шунингдек, мутахассис Мисрнинг «Ал-Масри» ва «Керамика Клеопатра» клубларини ҳам бошқарган. Эндиликда унинг олдига Тунис терма жамоасини Африканинг етакчи терма жамоалари қаторига қайтариш ва кейинги жаҳон чемпионати саралашидан муваффақиятли ўтиш вазифаси қўйилган.