Ҳужумчи Гонсало Гарсия «Реал»дан «Фулҳэм»га ўтганидан сўнг Мадрид клуби мухлисларига мурожаат қилди.

«Мен Чемпионлар Лигаси кечасида «Сантьяго Бернабеу»да дебют қилишни ҳеч қачон хаёл сурмагандим. Ҳаттоки, дунёнинг энг яхши футбол академиясининг бир қисмига айланишимни тасаввур ҳам қилолмасдим. Шу бугун ўзимни дунёдаги энг миннатдор футболчидек ҳис қиляпман.

«Реал Мадрид» ёшлигимдан бери менинг уйимга айланди. Бу ерда ўтказган олти йилим давомида ушбу клуб сингдирадиган қадриятлар қанчалик муҳимлигини чин дилдан англадим. Бу либосни кийиш — фақат ўйинларда ғалаба қозонишгина эмас, балки, айтишга журъат қиламанки, бутун жаҳон спортидаги энг буюк гербни шараф билан ҳимоя қилиш демакдир.

Мени тўғри йўлга йўналтирган кўплаб мураббийлар ва жамоадошларимни бирма-бир санаб ўтишим мумкин эди, аммо «Реал»га энг самимий миннатдорчилик сўзларини айтиш — бу уларнинг ҳар бирига фидойилиги, ишончи ва қўллаб-қувватлагани учун ташаккур билдиришдир.

«Реал Мадрид» ҳамиша ҳаётимнинг жуда катта қисми бўлиб қолади. Ҳаммаси учун раҳмат», — деб ёзди футболчи ижтимоий тармоқдаги саҳифасида.

Гарсия «Реал» тарбияланувчиси ҳисобланади. У мадридликлар таркибида 51 та ўйин ўтказиб, 13 та гол урган ва 5 та голли узатмага муаллифлик қилган.

Transfermarkt портали 22 ёшли испаниялик футболчининг бозор қийматини 30 миллион еврога баҳоламоқда.