Неймарнинг отаси ўғлининг 2026 йилги Жаҳон чемпионатидан сўнг Бразилия терма жамоасидаги фаолиятини якунлаш борасидаги қарорига изоҳ берди.

Неймарнинг отаси футболчи «пентакампеонлар» сафига ҳали қайтиши мумкинлиги ҳақида фикр билдирди: «Унинг Бразилия терма жамоасидаги иштироки 100 фоиз тугаганини кафолатлай олмайман. Эҳтимол, у ҳали қайтар».

Неймар эса бунга жавобан: «Ахир ўйнаётган отам эмас-ку!» — деди кулиб. Неймар ва унинг отасининг сўзларини журналист ҳамда инсайдер Фабрицио Романо X (Твиттер) ижтимоий тармоғида келтириб ўтди.

Эслатиб ўтамиз, Неймар Бразилия терма жамоаси тарихидаги энг яхши тўпурар ҳисобланади. У миллий терма жамоа либосида 130 та ўйинда 80 та гол урган. Бразилия терма жамоаси таркибида Неймар Олимпиада ғолиби (2016), Олимпия ўйинлари (2012) ва Америка Кубоги (2021) кумуш медали соҳиби, шунингдек, Конфедерациялар кубоги (2013) соҳиби бўлган.