"Ливерпуль" ярим ҳимоячиси Кёртис Жонс Миланнинг "Интер" клуби учун устувор трансфер мақсадлари орасида қолмоқда.

"Нерадзуррилар" англиялик футболчи бўйича узоқ вақтдан бери музокаралар олиб бормоқда, аммо ҳозирча бу саъй-ҳаракатлар натижа бергани йўқ. Журналист Жанлуиджи Лонгарининг хабар қилишича, барча қийинчиликларга қарамай, 26 ёшли футболчининг жорий трансфер ойнаси ёпилгунига қадар "Интер"га ўтиш эҳтимоли 70 фоизни ташкил этади.

Кёртис Жонснинг "Ливерпуль" билан амалдаги шартномаси келаси йилнинг ўрталарида якунига етади. "Қизиллар" тарбияланувчисининг трансфер қиймати Transfermarkt экспертлари томонидан 35 миллион еврога баҳоланмоқда. Ярим ҳимоячи мерсисайдликлар сафида жами 228 та ўйин ўтказиб, 22 та гол ва 25 та голли узатмага муаллифлик қилган.