«Тоттенхэм»нинг марказий ҳимоячиси Кристиан Ромеро «Барселона»нинг трансфер нишонига айланиши мумкин.

Каталония клуби «шпоралар» сардорини анчадан бери кузатиб келади, бироқ унинг номзоди устувор ҳисобланмас эди. Эндиликда вазият ўзгариши мумкин, чунки «кўк-анорранглилар» Рональд Араухони қўйиб юборишга рози бўлишди – уни «Ливерпуль» ижарага олмоқда. Инсайдер Фабрицио Романонинг хабар беришича, «Барса»да Ромерони ўз томонига оғдириб олиш учун барча имкониятлар мавжуд. Мадриднинг «Атлетико» клуби аргентиналикнинг трансфери устида фаол ишламоқда, аммо у билан ҳозирча келишувга эришилгани йўқ.

«Барселона» Араухо билан хайрлашгач, янги марказий ҳимоячи билан шартнома имзолашни режалаштиряптими-йўқми, ҳозирча аниқ эмас. Вазият яқин орада ойдинлашиши керак.

Миш-мишларга кўра, Кристиан Ромеронинг ўзи ҳам Ханс-Дитер Флик жамоасига ўтишни истайди.