«Аякс» вингери Мика Годтс Парижнинг «ПСЖ» клуби уни трансфер қилиш масаласида Нидерландия жамоаси билан музокара олиб бораётганини тасдиқлади.

ESPN NL маълумотига кўра, 21 ёшли бельгиялик футболчи «Аякс»нинг «ПЕК Зволле» устидан 2:0 ҳисобидаги ғалабасига ассист билан ҳисса қўшган. Учрашувдан сўнг у амстердамликлар сафида ўйнашни истамаётгани ҳақидаги хабарларни рад этди.

«Мен «Аякс»да ўйнаётганимдан хурсандман. Мен ўйнашни истамаяпман, деган гаплар ёлғон! Ҳа, ПСЖ билан музокаралар давом этмоқда, аммо ҳозирча мен шу ердаман ва бор кучимни жамоага беряпман», — деди Годтс.

«ПСЖ»нинг қизиқиши футболчининг келажаги борасида ноаниқлик юзага келишига сабаб бўлган. Бироқ Годтс музокаралар унинг «Аякс»даги вазифасига таъсир қилмаётганини таъкидлади.

Айни вақтда икки клуб бельгиялик футболчининг эҳтимолий трансфери бўйича музокараларни давом эттирмоқда.