«Интер Майами» Лигалар кубогида «Леон»га мағлуб бўлиб, гуруҳ босқичидан чиқиш имкониятини йўқотди.

Учрашув Мексика клубининг 3:2 ҳисобидаги ғалабаси билан якунланди. «Интер Майами» баҳс давомида икки марта ҳисобда олдинга чиқди, аммо меҳмонлар ҳар сафар мувозанатни тиклашга муваффақ бўлди. Учрашув охирида эса «Леон» ғалаба голини киритди.

The Touchline маълумотига кўра, шу тариқа 39 ёшли Лионель Месси профессионал фаолиятида илк бор ўзи иштирок этган турнирнинг гуруҳ босқичидан ўта олмади. Аргентиналик футболчининг жамоалари бунга қадар у иштирок этган барча турнирларда гуруҳдан чиқиб, плей-офф босқичига йўл оларди.

«Леон»га қарши учрашувда Месси иккинчи бўлим бошланиши олдидан захирадан майдонга тушди, аммо гол ёки голли узатма қайд эта олмади.

«Интер Майами» уч турдан сўнг 3 очко тўплади. «Леон» эса барча учрашувларда ғалаба қозониб, 9 очко жамғарди.