Ромелу Лукакунинг «Фенербахче»га ўтиши расман тасдиқланди. 33 ёшли бельгиялик ҳужумчи «Наполи» ва Италияни тарк этиб, фаолиятини Туркияда давом эттиради.

Клублар ўртасидаги келишув тахминан 6 миллион евро эвазига амалга оширилди. Бундан ташқари, 2026/27 йилги мавсумда футболчининг шахсий кўрсаткичлари ва жамоавий натижаларга қараб яна 1 миллион еврогача бонус тўланиши мумкин.

Футбол бизнеси ва молиясига ихтисослашган Calcio&Finanza саҳифаси трансфернинг «Наполи» ҳисоб-китобларига қандай таъсир қилишини таҳлил қилди.

Маълумотга кўра, 2026 йил 30 июнь ҳолатига Лукакунинг клуб балансларидаги қолдиқ қиймати 6,1 миллион еврони ташкил этган. Бунга «Наполи» ҳужумчи шартномасининг сўнгги йили учун тўлаши керак бўлган 6 миллион евро соф маошдан қутулишини ҳам қўшиш лозим. Солиқлар билан ҳисоблаганда бу сумма тахминан 7,8 миллион еврога тенг.

Шу тариқа, Лукакунинг кетиши «Наполи» молиявий ҳисоботларига жами қарийб 13,8 миллион евро ижобий таъсир кўрсатади.

Бироқ бу суммадан 2,45 миллион евро чегириб ташланади. Сабаби, Лукаку «Челси»дан «Наполи»га ўтган пайтдаги келишувга мувофиқ, футболчининг кейинги сотувидан тушадиган маблағнинг 40 фоизи Лондон клубига тегиши керак.

Натижада «Наполи» Лукакунинг «Фенербахче»га трансфери орқали умумий ҳисобда тахминан 11,5 миллион евро иқтисод қилиши кутилмоқда.