Миланнинг "Интер" клуби "Тоттенхэм"нинг ўнг қанот ҳимоячиси Жед Спенс билан таркибини кучайтирди.
Трансфер шанба куни расман амалга ошди, битим қиймати 30 миллион еврога баҳоланмоқда. Transfermarkt маълумотларига кўра, англиялик футболчи "нерадзурри" тарихидаги ҳимоячилар ўртасидаги бешинчи энг қиммат харидга айланди. Клуб фақат Ашраф Ҳакимий (43 млн евро), Алессандро Бастони (40,7 млн евро), Милан Шкриньяр (34 млн евро) ва Бенжамен Павар (32,4 млн евро) учун бундан каттароқ маблағ сарфлаган.
Эътиборлиси, ўша портал талқинига кўра, Жед Спенснинг бозор қиймати 40 миллион еврони ташкил этади. Англия терма жамоасининг 26 ёшли футболчиси А Серия гранди билан 2031 йилгача мўлжалланган меҳнат шартномасини имзолади.
