Milanning "Inter" klubi "Tottenxem"ning o‘ng qanot himoyachisi Jed Spens bilan tarkibini kuchaytirdi.

Transfer shanba kuni rasman amalga oshdi, bitim qiymati 30 million yevroga baholanmoqda. Transfermarkt ma’lumotlariga ko‘ra, angliyalik futbolchi "neradzurri" tarixidagi himoyachilar o‘rtasidagi beshinchi eng qimmat xaridga aylandi. Klub faqat Ashraf Hakimiy (43 mln yevro), Alessandro Bastoni (40,7 mln yevro), Milan Shkrinyar (34 mln yevro) va Benjamen Pavar (32,4 mln yevro) uchun bundan kattaroq mablag‘ sarflagan.

E’tiborlisi, o‘sha portal talqiniga ko‘ra, Jed Spensning bozor qiymati 40 million yevroni tashkil etadi. Angliya terma jamoasining 26 yoshli futbolchisi A Seriya grandi bilan 2031 yilgacha mo‘ljallangan mehnat shartnomasini imzoladi.