"Хетафе" "Ливерпуль" ярим ҳимоячиси Стефан Байчетични ўз сафига қўшиб олиш имкониятини кўриб чиқмоқда. Бу ҳақда инсайдер Фабрицио Романо хабар берди.
Манба маълумотига кўра, клублар эҳтимолий трансфер формати юзасидан музокараларни бошлаган. Бироқ ҳозирча футболчининг ўтиши шартлари бўйича аниқ келишувга эришилмаган.
21 ёшли испаниялик ярим ҳимоячи "Ливерпуль"га тегишли. Байчетич икки йилдан ортиқ вақтдан буён "қизиллар"нинг асосий жамоаси сафида майдонга тушмаган. У ўтган йилнинг май ойида сон орқа қисмида жарроҳлик амалиётини ўтказган ва шундан кейин узоқ вақт ўйинлардан четда қолган.
Жароҳат сабаб Байчетич 2024/25 йилги мавсумнинг иккинчи ярмида ижара асосида ўйнаган "Лас-Пальмас" сафидаги иштирокини ҳам муддатидан олдин якунлаган эди.
Жорий йил июль ойида ярим ҳимоячи "Ливерпуль" таркибига қайтиб, жамоанинг Чикагода ўтказилган мавсумолди йиғинига қўшилди.
