«Манчестер Сити»нинг собиқ дарвозабони Жо Харт бу ёзда 9 йиллик фаолиятидан сўнг жамоани тарк этган Пеп Гвардиоланинг ўрнини эгаллаган янги бош мураббий Энцо Марескадан биринчи мавсумдаёқ ҳаддан ташқари юқори натижалар талаб қилинмаслиги керак деб ҳисоблайди.

«Борган футболчилар ва ҳали жамоага келиб қўшилмаганларни ҳисобга олсак, клуб барча совринлар учун курашишни хоҳлаши аниқ, аммо бу мавсумда Марескага илгаригидек катта босим ўтказишмайди. Вужудга келадиган шов-шувлар эса ташқаридан бўлади, холос», — дейди Харт BBC билан суҳбатда.

«Клубнинг тажрибаси ва эришган муваффақиятлари АПЛ ва Чемпионлар Лигасида ғолиб чиқиш қанчалик қийин эканини тушунишга етарли. Улар 2, 3 ёки 4-ўринни эгаллашни жамоанинг инқирози деб баҳолайдиган даражада муваффақиятга оч эмас. Клуб Марескага ишонади ва унинг тайинланишини таваккалчилик деб ҳисобламайди».

«Манчестер Сити» мавсумни Англия Суперкубогида «Арсенал»дан учралган мағлубият билан бошлади. Харт клуб ушбу муваффақиятсиз ўйиндан сўнг шошма-шошарлик билан хулоса чиқармаслигига ишонади.

«Бу жуда реал қарайдиган клуб. Уларга янгича қарашлар керак, аммо ҳозир ҳамма хотиржамлик ва диққатни сақлаб қолиши лозим. «Манчестер Сити» бу натижага кескин муносабат билдирмайди деб ўйлайман. Бу шунчаки ёмон ўйин бўлди ва баъзи футболчилар майдонда ўзларини эркин ҳис қила олишмади».

«Манчестер Сити» АПЛнинг янги мавсумини 23 август куни «Борнмут»га қарши ўйин билан бошлайди.