Испаниялик мутахассис ўн йиллик муваффақиятли фаолиятидан сўнг клубни тарк этди.

Ижтимоий тармоқларда Хосеп Гвардиоланинг «Манчестер Сити» футболчилари билан хайрлашув лавҳалари пайдо бўлди. Тармоқда Пепнинг манчестерликлар клубидаги сўнгги икки йили ҳақида ҳикоя қилувчи «A Beautiful Obsession» (Гўзал иштиёқ) номли ҳужжатли фильм намойиш этилди. Тренернинг футболчилар олдидаги хайрлашув нутқи энг таъсирли лаҳзага айланди:

«Йигитлар, мен қисқа гапираман. Якшанба куни «Манчестер Сити» бош мураббийи сифатидаги сўнгги ўйиним бўлиб ўтади. Сабаби жуда оддий: ишни давом эттириш учун энергия керак. Аммо қалбимнинг тўрида бу куч-қувват бошқа қолмаганини ҳис қиляпман».

Бундан ташқари, Гвардиола футболчиларга миннатдорчилик билдирди ва ушбу қарор ҳақида расмий эълон берилишидан олдин биринчи бўлиб айнан улар билишга ҳақли эканини таъкидлади.

Гвардиола «Манчестер Сити»ни 2016 йилдан 2026 йилгача бошқарди. Ушбу давр мобайнида у клуб билан 20 та соврин, жумладан 6 марта Англия чемпионлиги ва Чемпионлар Лигасида ғалаба қозонди.