Исроил футбол ассоциацияси ФИФА президентлиги учун бўлиб ўтадиган навбатдаги сайловларда Жанни Инфантинони қўллаб-қувватлашдан воз кечди.
Эслатиб ўтамиз, июль ойи охирида ФИФА жаҳон чемпионати ҳуқуқларини сотиш билан шуғулланувчи FIFA Forward Enterprise (FFE) номли янги тижорий тузилмани ташкил этишни режалаштираётгани маълум бўлганди. Кейинчалик футбол конфедерациялари томонидан билдирилган танқидлар ҳамда УЕФАга аъзо мамлакатларнинг жаҳон чемпионатини бойкот қилиш эҳтимоли фонида Инфантино бу ғоядан воз кечди.
«Сўнгги воқеалар мисли кўрилмаган ишонч инқирозига олиб келди. Биз ҳали ҳам бу вазиятни бартараф этиш мумкинлигига умид қиламиз. Шунингдек, жаҳон футболи бошқаруви масаласида УЕФА ва бошқа конфедерациялар қарашлари билан ФИФА позицияси ўртасида жиддий тафовутлар юзага келди.
Томонлар ўртасидаги келишмовчиликлар чуқур, жиддий ва принципиал кўриниш олган. Бу эса барча манфаатдор томонларни келгусидаги йўлни қайта кўриб чиқишга мажбур қилмоқда.
Юзага келган шароитда Инфантинони қўллаб-қувватлаш ҳақида аввал юборган хатимизни қайтариб олишдан бошқа чорамиз қолмади. Барча томонлар ўртасидаги самарали мулоқот охир-оқибат жаҳон футболи келажаги борасида умумий қарашларни тиклаш ва тўғри ривожланиш йўналишини белгилашга ёрдам беради, деган самимий умиддамиз», — деди Исроил футбол ассоциацияси президенти Моше Зуарес ФИФАга юборган мактубида.
