"Жирона" расмий сайти орқали украиналик ҳужумкор ярим ҳимоячи Виктор Циганковга нисбатан интизомий иш очилганини маълум қилди.
Клуб баёнотида қайд этилишича, текширув футболчининг "сўнгги вақтлардаги хатти-ҳаракатлари" билан боғлиқ. "Жирона" Циганковнинг хулқ-атвори унинг шартнома бўйича мажбуриятлари ва клуб ичидаги одоб-ахлоқ меъёрларига зид бўлиши мумкин, деб ҳисобламоқда.
Интизомий иш доирасида клуб зарур чораларни кўришини ҳам билдирган.
Аввалроқ матбуотда Виктор Циганков "Жирона" Ла Лигадан тушиб кетганидан кейин клубни тарк этиш нияти борлигини раҳбариятга маълум қилгани ҳақида хабарлар тарқалганди.
Циганков "Жирона" сафида жами 119 та учрашувда майдонга тушиб, 20 та гол урган ва 23 та голли узатмани амалга оширган.
