Туриннинг «Ювентус» клуби янги футболчиси Жон Лукуми жамоага ўтиш қарорида Хуан Куадрадонинг таъсири катта бўлганини айтди.
Колумбиялик ҳимоячининг сўзларига кўра, Куадрадонинг «Ювентус»даги ўйинлари унда катта таассурот қолдирган ва бир кун келиб ўзи ҳам шу клуб либосини кийишни орзу қилган. Энди эса бу орзу амалга ошди — Лукуми «Болонья»дан «Ювентус»га ўтди.
«Куадрадонинг қандай ўйнаганини яхши эслайман. У ўзини жуда яхши кўрсатган, деб ўйлайман. Колумбияда ҳам уни “Ювентус”даги ўйинлари туфайли муҳим футболчи сифатида қадрлашади.
“Ювентус”да ҳар доим кучли ҳимоячилар бўлган. Кьеллини, Бонуччи, Барцальи — мен уларга ўхшашни, улардан намуна олишни истайман», — деди Лукуми.
Унинг сўзларини derbyderbyderby.it нашри келтирган.
Эслатиб ўтамиз, Италия А Сериясининг янги мавсуми шу ҳафта охирида старт олади.
