Turinning «Yuventus» klubi yangi futbolchisi Jon Lukumi jamoaga o‘tish qarorida Xuan Kuadradoning ta’siri katta bo‘lganini aytdi.

Kolumbiyalik himoyachining so‘zlariga ko‘ra, Kuadradoning «Yuventus»dagi o‘yinlari unda katta taassurot qoldirgan va bir kun kelib o‘zi ham shu klub libosini kiyishni orzu qilgan. Endi esa bu orzu amalga oshdi — Lukumi «Bolonya»dan «Yuventus»ga o‘tdi.

«Kuadradoning qanday o‘ynaganini yaxshi eslayman. U o‘zini juda yaxshi ko‘rsatgan, deb o‘ylayman. Kolumbiyada ham uni “Yuventus”dagi o‘yinlari tufayli muhim futbolchi sifatida qadrlashadi.

“Yuventus”da har doim kuchli himoyachilar bo‘lgan. Kyellini, Bonuchchi, Barsali — men ularga o‘xshashni, ulardan namuna olishni istayman», — dedi Lukumi.

Uning so‘zlarini derbyderbyderby.it nashri keltirgan.

Eslatib o‘tamiz, Italiya A Seriyasining yangi mavsumi shu hafta oxirida start oladi.