«Коринтианс» ҳужумчиси Мемфис Депай Бразилия клуби билан шартномасини узайтирганидан сўнг ўз таассуротлари билан ўртоқлашди.

«Ҳозир менда жуда кўп ҳис-туйғулар бор — ҳам хаёлимда, ҳам бутун вужудимда. Аввало, шартномани узайтириш жараёнида иштирок этган барчага миннатдорлик билдирмоқчиман.

Албатта, «Коринтианс» — улкан клуб. Мен ҳам, бошқалар ҳам унинг нақадар буюк эканини кўрдик. Биргаликда қанчалик катта куч эканимизни ҳам намоён этдик. Мен жуда ва жуда бахтлиман. Машғулотларга қайтишни сабрсизлик билан кутяпман. Олдимизда курашишимиз керак бўлган кўплаб мақсадлар бор. Мен жуда хурсандман», — дея Депайнинг сўзларини келтиради клуб матбуот хизмати.

Мемфис Депай 2024 йилдан буён «Коринтианс» шарафини ҳимоя қилиб келмоқда. У Бразилия клуби сафида барча мусобақалар доирасида 79 та ўйинда майдонга тушиб, 20 та гол урган ва 15 та голли узатмани амалга оширган.