«Korintians» hujumchisi Memfis Depay Braziliya klubi bilan shartnomasini uzaytirganidan so‘ng o‘z taassurotlari bilan o‘rtoqlashdi.

«Hozir menda juda ko‘p his-tuyg‘ular bor — ham xayolimda, ham butun vujudimda. Avvalo, shartnomani uzaytirish jarayonida ishtirok etgan barchaga minnatdorlik bildirmoqchiman.

Albatta, «Korintians» — ulkan klub. Men ham, boshqalar ham uning naqadar buyuk ekanini ko‘rdik. Birgalikda qanchalik katta kuch ekanimizni ham namoyon etdik. Men juda va juda baxtliman. Mashg‘ulotlarga qaytishni sabrsizlik bilan kutyapman. Oldimizda kurashishimiz kerak bo‘lgan ko‘plab maqsadlar bor. Men juda xursandman», — deya Depayning so‘zlarini keltiradi klub matbuot xizmati.

Memfis Depay 2024 yildan buyon «Korintians» sharafini himoya qilib kelmoqda. U Braziliya klubi safida barcha musobaqalar doirasida 79 ta o‘yinda maydonga tushib, 20 ta gol urgan va 15 ta golli uzatmani amalga oshirgan.