Венгрия футбол федерацияси раҳбари Шандор Чани ФИФА президенти Жанни Инфантинони қўллаб-қувватлашдан воз кечди.
17 август куни ФИФА Инфантинонинг жаҳон чемпионати ҳуқуқларининг бир қисмини хусусий инвесторларга сотиш режасини танқид қилган операцион директор Кевин Лямурни лавозимидан озод қилган эди.
The Guardian нашрининг AFPга таяниб хабар беришича, Чани сешанба куни Инфантино номига мактуб йўллаган.
Миллиардер, бизнесмен ва банкир ўз мактубида ФИФА президентини энди қўллаб-қувватламаслигини билдирган. У Инфантинонинг "касбий салоҳияти, ахлоқий меъёрлари ва раҳбарлик фазилатлари"ни танқид қилиб, унга бўлган ишончини йўқотганини маълум қилган. Шунингдек, Лямурнинг кутилмаган ишдан бўшатилишини "сабр косасини тўлдирган сўнгги томчи" деб атаган.
"ФИФАни ҳамкорлигимизга аввал асос бўлган умумий қадриятларга мувофиқ муваффақиятли ва самарали бошқара олишингизга бўлган ишончимга путур етди", — деб ёзган Чани.
Мактубда, шунингдек, 2026 йилги жаҳон чемпионати билан боғлиқ "бир қатор баҳсли қарорлар" ҳамда Инфантинонинг ФИФА мусобақаларини ўтказишни ташқи ташкилотларга топшириш режаларидаги иштироки тилга олинган.
Чани ФИФА кенгашидаги саккиз нафар вице-президент орасида Инфантинони истеъфога чақирган бешинчи шахс бўлди. Аввалроқ УЕФА президенти Александер Чеферин, КОНКАКАФ вакили Виктор Монтальяни, ОФК раҳбари Шайх Салмон бин Иброҳим Ал-Халифа ва Англия футбол ассоциацияси раҳбари Дебби Хьюитт ҳам шундай позицияни билдирган.
ФИФА вице-президентларидан фақат уч нафари Инфантинони қўллаб-қувватламоқда — КОНМЕБОЛ вакили Алехандро Домингес, Африка футбол конфедерацияси раҳбари Патрис Мотсепе ва Океания футбол конфедерацияси раҳбари Ламберт Малток.
