Дортмунднинг «Боруссия» клуби Люксембург миллий жамоасининг 17 ёшли ярим ҳимоячиси Энцо дос Сантос билан профессионал шартнома имзолади. Келишув узоқ муддатга мўлжалланган, аммо унинг аниқ давомийлиги клуб томонидан ошкор қилинмаган.
«Боруссия» спорт бўйича бошқарувчи директори Ларс Риккен ёш футболчини клубда узоқ муддатга сақлаб қолишга эришилганидан мамнун эканини таъкидлади. Унинг сўзларига кўра, Дос Сантос сўнгги ойларда сезиларли ўсишга эришган ва асосий жамоа билан мавсумолди тайёргарлик жараёнида ўзининг катта салоҳиятга эга эканини кўрсатган.
Дос Сантос 2025 йил январда Люксембургнинг «Свифт Эсперанж» клубидан «Боруссия» академиясига келиб қўшилган. Шундан сўнг у дортмундликларнинг U17, U19 ва ёшлар жамоалари сафида тўп тепди.
Энцо 16 ёшида Люксембург миллий жамоасида дебют қилди. Шу тариқа у «Боруссия» тарихида ўз мамлакати миллий жамоасида майдонга тушган энг ёш футболчига айланди. Айни пайтга қадар ярим ҳимоячи Люксембург термаси сафида 5 та учрашув ўтказган.
17 ёшли футболчининг асосий мақсадларидан бири келажакда «Боруссия»нинг асосий жамоасида ўйнаш. Дос Сантоснинг ўзи ҳам бир куни Дортмунддаги машҳур «Сариқ девор» қаршисида майдонга тушишни орзу қилишини таъкидлаган.
