Мадриднинг «Реал» клуби бош мураббийи Жозе Моуриньо расмий ўйинларни соғинганини ва мавсум дебюти олдидан хотиржам эканини тан олди. «Қаймоқранглилар» 2026/27 йилги мавсумдаги илк расмий учрашувини Ла Лиганинг 2-тури доирасида 22 август, шанба куни сафарда «Эспаньол»га қарши ўтказишади.

«Ўзимни жуда яхши ҳис қиляпман. Хотиржамман, бу шунчаки навбатдаги мавсум. Жамоанинг турли гуруҳларга бўлингани сабабли мавсумни бошлаш бироз қийин кечди: баъзи футболчилар 36 та машғулот ва 6 та ўйинда қатнашган бўлса, бошқаларида машғулот ва ўйинлар сони камроқ бўлди. Шунга қарамай, ҳозирги вазиятдан мамнунман. Яна бир ҳафта тайёргарлик кўришни хоҳлармидим? Ҳа. Аммо биз ўртоқлик ўйинларидан чарчадик. Биз бу касбни ўртоқлик ўйинлари учун эмас, ҳақиқий ўйинлар учун севамиз.

Ўтган мавсумда жароҳат олган футболчилар узоқ муддатга сафдан чиқишган ва уларнинг икки-уч ҳафтада тайёр бўлишини кутмаяпман. Янгилардан фақат Эндрик эртанги ўйинда майдонга тушмайди. Тчуаменининг аҳволи яхши, у тикланишни тезлаштириш учун машғулотларни давом эттиради, аммо эртанги баҳсга тўлиқ тайёр бўла олмайди», — дейди Моуриньо.