"Челси" ҳужумчиси Жоау Педро Лондон клуби билан янги шартнома имзолайди. BBC маълумотига кўра, келишув 2032 йилга қадар мўлжалланади ва уни яна икки йилга узайтириш имконияти бўлади.

24 ёшли бразилиялик футболчи "Челси"га келганида, унинг дастлабки шартномаси 2033 йилгача амал қилиши эълон қилинган эди. Бироқ манба маълумотига кўра, аслида келишув 2032 йилгача тузилган ва унда яна бир йилга узайтириш имконияти мавжуд бўлган.

"Челси" одатда футболчилар билан шартнома муддатини расман эълон қилишда клуб ихтиёридаги узайтириш опцияларини ҳам умумий муддатга қўшиб кўрсатади.

Шу сабабли Жоау Педронинг янги шартномаси расман тасдиқланганда, футболчи клуб билан 2034 йилгача боғлангани эълон қилиниши кутилмоқда. Аслида эса шартнома 2032 йилгача амал қилади ва уни яна икки йилга узайтириш имконияти бўлади.

Жоау Педро 2025 йил июлидан буён "Челси" шарафини ҳимоя қилиб келмоқда. У 2025/26 йилги мавсумда барча мусобақалар доирасида 50 та ўйинда майдонга тушиб, 23 та гол урди ва 5 та голли узатмани амалга оширди.

Transfermarkt портали футболчининг трансфер қийматини 80 миллион еврога баҳоламоқда.