"Chelsi" hujumchisi Joau Pedro London klubi bilan yangi shartnoma imzolaydi. BBC ma’lumotiga ko‘ra, kelishuv 2032 yilga qadar mo‘ljallanadi va uni yana ikki yilga uzaytirish imkoniyati bo‘ladi.

24 yoshli braziliyalik futbolchi "Chelsi"ga kelganida, uning dastlabki shartnomasi 2033 yilgacha amal qilishi e’lon qilingan edi. Biroq manba ma’lumotiga ko‘ra, aslida kelishuv 2032 yilgacha tuzilgan va unda yana bir yilga uzaytirish imkoniyati mavjud bo‘lgan.

"Chelsi" odatda futbolchilar bilan shartnoma muddatini rasman e’lon qilishda klub ixtiyoridagi uzaytirish opsiyalarini ham umumiy muddatga qo‘shib ko‘rsatadi.

Shu sababli Joau Pedroning yangi shartnomasi rasman tasdiqlanganda, futbolchi klub bilan 2034 yilgacha bog‘langani e’lon qilinishi kutilmoqda. Aslida esa shartnoma 2032 yilgacha amal qiladi va uni yana ikki yilga uzaytirish imkoniyati bo‘ladi.

Joau Pedro 2025 yil iyulidan buyon "Chelsi" sharafini himoya qilib kelmoqda. U 2025/26 yilgi mavsumda barcha musobaqalar doirasida 50 ta o‘yinda maydonga tushib, 23 ta gol urdi va 5 ta golli uzatmani amalga oshirdi.

Transfermarkt portali futbolchining transfer qiymatini 80 million yevroga baholamoqda.