Инсайдер Фабрицио Романонинг хабар беришича, «Ливерпуль» «Брайтон»нинг қанот ҳужумчиси Янкуба Минте учун 70 миллион евро миқдорида таклиф юборди ва гамбиялик вингернинг ўзи билан шахсий шартнома шартларини тўлиқ келишиб олди.

Манбага кўра, «Брайтон» билан музокаралар давом этмоқда ва мерсисайдликлар ушбу трансфернинг амалга ошишига оптимистик руҳда қарашмоқда. Шуниси эътиборлики, Минтенинг хариди «Ливерпуль» учун асосий трансфер нишони бўлиб қолаётган Брэдли Барколага муқобил вариант эмас — клуб ҳар икки йўналишда ҳам иш олиб бормоқда.

Ўтган мавсумда Минте барча турнирларда 36 та ўйинда майдонга тушиб, 3 та гол урди ва 4 та голли узатмага муаллифлик қилди. Унинг «Брайтон» билан амалдаги шартномаси 2029 йилнинг ёзигача мўлжалланган. Transfermarkt порталига кўра, вингернинг бозор қиймати 45 миллион еврони ташкил этади.