«Барселона» бош мураббийи Ханс-Дитер Флик клуб раҳбарияти янги марказий ҳимоячи харид қилишга қарор қилса, қайси футболчини ўз жамоасида кўришни исташини белгилаб олди.

Goal нашрининг Жерар Ромеро маълумотларига таяниб хабар беришича, немис мутахассисини «РБ Лейпциг»нинг 23 ёшли марказий ҳимоячиси Кастелло Люкеба қизиқтирмоқда.

«Флик француз футболчисида «Барселона» ҳимоясини ўзгартира оладиган тезлик ва жисмоний кучни, шунингдек, ҳужумларни чуқурдан бошлашда юқори маҳоратни кўрмоқда», — дейилади манба хабарида.

Бироқ Люкебани харид қилиш осон бўлмайди. «РБ Лейпциг» жорий ёзда бир нечта муҳим футболчилари билан хайрлашгани сабабли яна бир асосий ўйинчисини қўйиб юборишни истамаяпти. Қолаверса, ҳимоячининг немис клуби билан шартномаси 2029 йилга қадар амал қилади.

Transfermarkt портали Люкебанинг бозор қийматини 50 миллион еврога баҳоламоқда. Хабарларга кўра, «Барселона» уни харид қилиш учун 50 миллион евродан ҳам кўпроқ маблағ сарфлашига тўғри келиши мумкин.