«Barselona» bosh murabbiyi Xans-Diter Flik klub rahbariyati yangi markaziy himoyachi xarid qilishga qaror qilsa, qaysi futbolchini o‘z jamoasida ko‘rishni istashini belgilab oldi.

Goal nashrining Jerar Romero ma’lumotlariga tayanib xabar berishicha, nemis mutaxassisini «RB Leypsig»ning 23 yoshli markaziy himoyachisi Kastello Lyukeba qiziqtirmoqda.

«Flik fransuz futbolchisida «Barselona» himoyasini o‘zgartira oladigan tezlik va jismoniy kuchni, shuningdek, hujumlarni chuqurdan boshlashda yuqori mahoratni ko‘rmoqda», — deyiladi manba xabarida.

Biroq Lyukebani xarid qilish oson bo‘lmaydi. «RB Leypsig» joriy yozda bir nechta muhim futbolchilari bilan xayrlashgani sababli yana bir asosiy o‘yinchisini qo‘yib yuborishni istamayapti. Qolaversa, himoyachining nemis klubi bilan shartnomasi 2029 yilga qadar amal qiladi.

Transfermarkt portali Lyukebaning bozor qiymatini 50 million yevroga baholamoqda. Xabarlarga ko‘ra, «Barselona» uni xarid qilish uchun 50 million yevrodan ham ko‘proq mablag‘ sarflashiga to‘g‘ri kelishi mumkin.