«Андижон» футболчиси Ҳумоюнмирзо Иминов «Хоразм»га қарши учрашув олдидан клуб матбуот хизмати саволларига жавоб берди.

Маълумки, Иминов учун «Хоразм» бегона жамоа эмас. У ўтган мавсумда Урганч клуби шарафини ҳимоя қилган. Жорий мавсумнинг биринчи даврасида «Андижон» «Хоразм»ни сафарда 3:0 ҳисобида мағлуб этган ва голлардан бирига айнан Иминов муаллифлик қилган.

Ярим ҳимоячи навбатдаги баҳсда ҳам собиқ жамоаси дарвозасини ишғол қилиш нияти борлигини яширмади.

«Хоразм» жуда яхши жамоа ва у ерда илиқ хотираларим қолган. Бўлажак баҳсга тайёргарлигимиз аъло даражада кетмоқда. Биз ҳар бир ўйинда майдонга ғалаба қозониш учун чиқамиз. Худо хоҳласа, ғалаба қозониб, «Андижон» мухлислари олдида юзимиз ёруғ бўлишини истайман.

Биринчи даврада гол ургандим. Худо хоҳласа, иккинчи даврада ҳам буни такрорлашга ҳаракат қиламан. Аммо энг муҳими — жамоамиз 3 очкони қўлга киритиши.

«Хоразм», айтганимдек, яхши жамоа. Лекин биз рақибга қараб эмас, ўз ўйинимизни кўрсатишимиз керак, деб ўйлайман. Ҳар бир жамоанинг ўзига яраша кучли томонлари бор. Биз ўз тактикамиз асосида яхши ўйнаб, ғалаба қозонишимиз муҳим.

Мен учун гол уриш ёки голли узатма беришдан кўра, жамоамга ёрдам бериш ва ғалаба қозониш муҳим.

«Бобур Арена»да Ўзбекистондаги энг яхши мухлислар бор. Улар қаршисида ўйнаш жуда мароқли ва ёқимли.

Қўлимиздан келганича ғалаба учун ҳаракат қиламиз. Ҳар бир турда фақат ғалаба учун майдонга тушамиз. Насиб қилса, «Хоразм»га қарши баҳсда ҳам ғалаба қозониб, мухлисларимизни хурсанд қиламиз. Улардан бизни қўллаб-қувватлашларини сўраб қоламан», — деди Иминов.