"Барселона" ҳимоячиси Алехандро Бальде ёзги трансфер ойнаси ёпилгунига қадар жамоани тарк этишга қарор қилди.

MARCA маълумотига кўра, 22 ёшли футболчи аввалроқ Каталония клубида қолиб, асосий таркибдаги ўрин учун курашмоқчи эди. Бироқ сўнгги кунлардаги воқеалар унинг фикрини ўзгартирган.

Бальденинг қарорига таъсир қилган асосий омиллардан бири Жоау Канселунинг "Барселона"га қайтиши бўлган. Португалиялик футболчи 20-август куни эркин агент сифатида каталонияликлар билан 2029-йилгача шартнома имзолади. Канселу ҳар икки қанотда ўйнай олади ва чап қанотда ҳам Бальдега рақобатчи ҳисобланади.

Бундан ташқари, Испания чемпионатининг "Эльче"га қарши биринчи тур учрашувида Бальде қайдномага ҳам киритилмади. Ханси Флик ўйиндан олдин ҳар бир футболчи ўз позицияси учун курашишга тўлиқ тайёр ва жамоа мақсадларига "100 фоиз содиқ" бўлиши кераклигини таъкидлаганди. "Барселона" ўша баҳсда 5:0 ҳисобида ғалаба қозонди, чап қанот ҳимоясида эса Ла Масия тарбияланувчиси Хави Эспарт ҳаракат қилди.

Сўнгги музокаралардан кейин Бальде янги жамоа излашга розилик берган. Футболчининг агенти Жорже Мендеш ва "Барселона" спорт директори Деку трансфер ойнаси якунлангунига қадар унга муносиб вариант топиш устида ишламоқда.

Ҳимоячига асосий даъвогарлардан бири "Манчестер Юнайтед" бўлиб турибди. Англия клуби ёз давомида чап қанот ҳимоясини кучайтириш вариантларини ўрганиб келган ва Бальде унинг рўйхатига киритилган. Бироқ трансфер ойнасининг сўнгги қисмидаги харажатлар сабаб "Юнайтед" футболчини тўлиқ сотиб олишдан кўра ижарага олиш вариантини маъқул кўрмоқда.

"Барселона" эса Бальдени доимий трансфер асосида сотишни афзал кўради. Айрим манбалар каталонияликлар футболчини тахминан 45 млн еврога баҳолаётганини хабар қилган. Шу билан бирга, трансфер ойнаси ёпилишига вақт кам қолгани сабаб клуб ижара бўйича таклифни ҳам кўриб чиқиши мумкин.

Бальде "Барселона" академияси тарбияланувчиси ҳисобланади ва асосий жамоада 2021 йилдан бери ўйнаб келади.