Германия Бундеслигасининг янги мавсуми старт олди. 1-турда Франкфуртнинг «Айнтрахт» клуби Берлинда «Унион» меҳмони бўлди ва жамоалар сермаҳсул дуранг қайд этди — 3:3.

«Айнтрахт»нинг учала голига ҳам Юнес Эбнуталиб муаллифлик қилди. Марокашлик келиб чиқишга эга, Германия фуқароси бўлган футболчи шу тариқа клуб тарихида чемпионатнинг илк ўйинида хет-трик қайд этган иккинчи футболчига айланди.

Бунга қадар бундай натижа фақат Бернд Никель томонидан қайд этилган эди. У 1977/78 йилги мавсумнинг дастлабки турида «Саарбрюккен» дарвозасига учта гол урган.

Бундеслиганинг кейинги турида «Айнтрахт» ўз майдонида «Аугсбург»ни қабул қилади.