УЕФАнинг собиқ раҳбари Мишель Платини ФИФА президенти Жанни Инфантинони истеъфога чиқишга чақирди.

Платини Инфантино раҳбариятини танқид қилиб, у футбол қоидаларини ҳимоя қилиш вазифасини бажара олмаганини таъкидлади.

«Иқтисодий масалалар — бу бошқа гап, аммо менимча, Инфантино муваффақиятсизликка учради, чунки у ўйин қоидаларининг кафолатчиси ва у уларга риоя қилмади. 2026 йилги Жаҳон чемпионатидаги реклама танаффуслари, мажбурий “сув ичиш” танаффуслари регламентда кўрсатилмаган. Финалдаги 30 дақиқалик танаффус ҳам регламентда йўқ. Қизил карточка [АҚШ терма жамоаси футболчиси Фоларин Балогунга берилган қизил карточканинг бекор қилиниши] эса энг ёмон ҳолат бўлди. У қоидаларнинг кафолатчиси, аммо уларга риоя қилмаяпти. У кетиши керак», — дея Платинининг сўзларини RMC Sport келтиради.

Аввалроқ Инфантино Жаҳон чемпионатларига хусусий инвестицияларни жалб қилиш режалари ошкор этилганидан сўнг қаттиқ танқидга учраган эди. УЕФА, КОНКАКАФ ва Осиё футбол конфедерацияси бу таклифни рад этган.

Кейинроқ УЕФА Инфантинонинг Жаҳон чемпионатларига бўлган ҳуқуқларнинг бир қисмини хусусий инвесторларга сотишга уриниши бўйича жиноий иш қўзғатиш ташаббусини илгари суришга тайёрланаётгани ҳақида хабар берилган.