“Пахтакор” футбол клуби жамоа ҳимоячиси Муҳаммадрасул Абдумажидовнинг Франция чемпионатига йўл олиши мумкинлиги ҳақида тарқалган хабарлар юзасидан расмий баёнот билан чиқди.

Қайд этилишича, пойтахт клубига хориж жамоасидан тўғридан-тўғри расмий таклиф келиб тушмаган. Фақатгина футболчининг агенти томонидан француз клубининг хати тақдим этилган бўлиб, унда ўйинчини кейинчалик сотиб олиш ҳуқуқи билан ижарага олиш сўралган. Бироқ ушбу таклиф “Пахтакор”ни қониқтирмаган. Шунингдек, айни пайтда Ўзбекистонда ёзги трансфер ойнаси ёпилгани ҳам таъкидланган.

Клуб матбуот хизматининг маълум қилишича, жамоа ҳозирда мавсумнинг муҳим палласида турибди ва кетадиган футболчининг ўрнини тўлдириш имкониятига эга эмас.

“ 'Пахтакоръни олдинда Элит Осиё Чемпионлар Лигаси мусобақаси кутмоқда. Ушбу турнирда муносиб иштирок этиш вазифаси қўйилган. Шу сабабли айни пайтдаги асосий мақсадимиз жамоа таркибини кучайтиришдан иборат, уни кучсизлантириш эмас.

Агар таклиф вақтлироқ келиб тушганида, уни батафсил муҳокама қилиш мумкин эди. Ёзги трансферлар вақтида икки нафар марказий ҳимоячи бошқа клубларга қўйиб юборилган. Шу туфайли ушбу таклифни фақат қишда кўриб чиқиш имкони борлигини маълум қиламиз”, дейилади клуб хабарида.

Эслатиб ўтамиз, аввалроқ Франциянинг “Брест” жамоаси “Пахтакор” ҳимоячиси Муҳаммадрасул Абдумажидовни ўз сафига қўшиб олмоқчи бўлгани, бироқ Тошкент клуби футболчини сотишни истамагани ҳақида хабар берилган эди.