«Васко да Гама» ҳужумчиси Дэвид Корреа Бразилияда штатлараро гиёҳванд моддалар ва қурол-яроғ савдоси, шунингдек, пул ювиш билан боғлиқ жиноятларни тергов қилиш доирасида полиция эътиборига тушди.

Душанба куни Рио-де-Жанейронинг бир қатор ҳудудларида тинтув ва ашёвий далилларни олиб қўйиш бўйича ордерлар ижро этилди. Улар орасида Корреанинг Барра-да-Тижукадаги уйи ҳамда «Васко да Гама»нинг Жакарепагуадаги машғулот базаси ҳам бор.

«A Tropa» деб номланган операция Бразилиянинг бир нечта штати ва Федерал округ ҳуқуқни муҳофаза қилувчи органлари иштирокида ўтказилмоқда. Жами 15 та тинтув ва ашёвий далилларни олиб қўйиш ордери, шунингдек, 4 та вақтинчалик ҳибсга олиш ордери ижро этилмоқда.

Тергов тадбирларига қарийб 100 нафар фуқаролик полицияси ходими, 38 дан ортиқ автомобиль ва 2 та вертолёт жалб қилинган.

Корреа жараённи кузатиш учун «Васко»нинг машғулот базасига шахсий автомобилида келган, аммо у ердан чиқиб кетаётганда ОАВга изоҳ беришдан бош тортган.

Эспириту-Санту фуқаролик полицияси маълумотига кўра, терговчилар жиноий гуруҳ билан бошқа профессионал спортчилар ва тадбиркорларнинг эҳтимолий алоқаларини ҳам ўрганмоқда.

«Васко да Гама» клуби эса полиция билан ҳамкорлик қилаётганини маълум қилди.

«Клуб ҳуқуқни муҳофаза қилувчи органлар билан ҳамкорлик қилмоқда ва тергов якунларини кутмоқда», — дейилади баёнотда.

Полиция «A Tropa» операцияси бир нечта штат ҳудудида фаолият юритаётган жиноий тузилмаларга қарши қаратилганини билдирди. Операция номи гумонланувчилар жиноий гуруҳни ўзаро «A Tropa» деб атагани билан боғлиқ экани айтилмоқда.

Тергов ҳали давом этмоқда. Полиция тинтув ўтказганининг ўзи Дэвид Корреа ёки бошқа шахсларнинг жиноий айбдорлигини англатмайди.