«Vasko da Gama» hujumchisi Devid Korrea Braziliyada shtatlararo giyohvand moddalar va qurol-yarog‘ savdosi, shuningdek, pul yuvish bilan bog‘liq jinoyatlarni tergov qilish doirasida polisiya e’tiboriga tushdi.

Dushanba kuni Rio-de-Janeyroning bir qator hududlarida tintuv va ashyoviy dalillarni olib qo‘yish bo‘yicha orderlar ijro etildi. Ular orasida Korreaning Barra-da-Tijukadagi uyi hamda «Vasko da Gama»ning Jakarepaguadagi mashg‘ulot bazasi ham bor.

«A Tropa» deb nomlangan operasiya Braziliyaning bir nechta shtati va Federal okrug huquqni muhofaza qiluvchi organlari ishtirokida o‘tkazilmoqda. Jami 15 ta tintuv va ashyoviy dalillarni olib qo‘yish orderi, shuningdek, 4 ta vaqtinchalik hibsga olish orderi ijro etilmoqda.

Tergov tadbirlariga qariyb 100 nafar fuqarolik polisiyasi xodimi, 38 dan ortiq avtomobil va 2 ta vertolyot jalb qilingan.

Korrea jarayonni kuzatish uchun «Vasko»ning mashg‘ulot bazasiga shaxsiy avtomobilida kelgan, ammo u yerdan chiqib ketayotganda OAVga izoh berishdan bosh tortgan.

Espiritu-Santu fuqarolik polisiyasi ma’lumotiga ko‘ra, tergovchilar jinoiy guruh bilan boshqa professional sportchilar va tadbirkorlarning ehtimoliy aloqalarini ham o‘rganmoqda.

«Vasko da Gama» klubi esa polisiya bilan hamkorlik qilayotganini ma’lum qildi.

«Klub huquqni muhofaza qiluvchi organlar bilan hamkorlik qilmoqda va tergov yakunlarini kutmoqda», — deyiladi bayonotda.

Polisiya «A Tropa» operasiyasi bir nechta shtat hududida faoliyat yuritayotgan jinoiy tuzilmalarga qarshi qaratilganini bildirdi. Operasiya nomi gumonlanuvchilar jinoiy guruhni o‘zaro «A Tropa» deb atagani bilan bog‘liq ekani aytilmoqda.

Tergov hali davom etmoqda. Polisiya tintuv o‘tkazganining o‘zi Devid Korrea yoki boshqa shaxslarning jinoiy aybdorligini anglatmaydi.