«Бавария» Германия кубоги биринчи босқичидан ўрин олган сафар учрашувида «Оснабрюк»ни 4:1 ҳисобида мағлуб этди.
Учрашувда ҳисобни мезбонлар очди. 5-дақиқада Робин Майсснер гол урди. Биринчи бўлим давомида мюнхенликлар сафида Харри Кейн ва Том Бишоф тўп киритиб, жамоасини олдинга олиб чиқди.
Иккинчи бўлимда Кейн пенальтини аниқ амалга ошириб, дубль қайд этди. «Бавария»нинг яна бир голига Майкл Олисе муаллифлик қилди.
«Оснабрюк» 2025/26 йилги мавсум якунларига кўра Иккинчи Бундеслигага йўлланма олган эди.
Шу тариқа, «Бавария» Германия кубогининг иккинчи босқичига чиқди. Мюнхенликларнинг кейинги рақиби қуръа ташлаш маросимидан сўнг маълум бўлади.
