Камерун футбол федерацияси президенти Самюэль Это’О Европа футбол ассоциациялари Африка футболи дуч келаётган муаммоларни тушуна олмаслигини айтди.
«Биз [европаликлар билан] ҳеч қачон воқеаларга бир хил нуқтаи назардан қарамаймиз. Масалан, бюджети 150 минг евро бўлган айрим федерацияларга назар ташласак, улар қандай қилиб йирик футбол давлатлари билан рақобатлаша олади?
Ҳеч ким Африка федерацияларининг айрим раҳбарлари ўз мамлакатларида футболни қандай бошқараётгани ҳақида сўрамайди. Агар иқтидорли футболчиларнинг кетиб қолиши юз берса, айб бизга юкланади. Аммо Камерун йилига 20 ёки 40 миллион долларлик бюджетга эга бўлганида эди, албатта, бизда ҳам ўз Мбаппе ва Тчуамени бўларди. Биз футболимизни яхшироқ ташкил қилган бўлардик», — дея Это’Онинг сўзларини RMC Sport келтирмоқда.
Эслатиб ўтамиз, июль ойи охирида ФИФА Жаҳон чемпионати трансляция ва бошқа тижорий ҳуқуқларини сотиш учун FIFA Forward Enterprise (FFE) номли янги тижорий тузилма ташкил этиш режасида экани маълум бўлган эди.
Кейинчалик ФИФА президенти Жанни Инфантино футбол конфедерациялари томонидан билдирилган танқидлар ва УЕФАга аъзо мамлакатларнинг Жаҳон чемпионатини бойкот қилиш эҳтимоли фонида бу ғоядан воз кечди.
Шундан сўнг айрим Европа футбол федерациялари 2027 йил март ойида бўлиб ўтадиган ФИФА президенти сайловида Инфантино номзодини қўллаб-қувватлашдан бош тортди.
