"Кристал Пэлас" бош мураббийи Пьер Саж ярим ҳимоячи Адам Уортон учун ёзги трансфер ойнасида таклифлар келиб тушганини тасдиқлади. Бироқ футболчининг ўзи жамоада қолиш тарафдори бўлган.

Саж қизиқиш билдирган клублар номини ошкор қилмади. Шу билан бирга, ёз бошида "Ливерпуль" 22 ёшли англиялик футболчига жиддий қизиқиш билдиргани ҳақида хабарлар тарқалганди. Манбага кўра, мерсисайдликлар Уортонни кузатишда давом этмоқда ва 2027 йилда унинг трансферига қайтиши мумкин.

"Биз Уортон бўйича таклифлар олдик, аммо клуб ўз позициясида қатъий турди. Футболчи ҳам бу қарорни тўлиқ қўллаб-қувватлади. У мен билан эҳтимолий кетиш ҳақида ҳеч қачон гаплашмаган. Менимча, у фаолиятини жуда ақлли бошқаряпти", — деди Саж.

Қизиғи, ёзда Уортонга "Манчестер Сити" ҳам қизиқиш билдирган. "Кристал Пэлас" эса футболчини сотиш нияти йўқлигини маълум қилган.

Саж шунингдек, Исмоила Саррнинг "Ливерпуль"га амалга ошмай қолган трансфери ҳақида ҳам гапирди. Мураббийнинг айтишича, сенегаллик футболчи бу вазиятни қабул қилиши учун вақт керак. Айни пайтда Сарр жароҳатидан ҳам тикланмоқда.

Сарр аввалроқ "Галатасарой"дан таклиф олган, шунингдек, "Ал-Ҳилол" билан ҳам боғланмоқда.