Бугун Испания чемпионати 6-тури доирасида Каталониянинг «Барселона» жамоаси ўз майдонида «Реал Сосьедат»ни қабул қилади. Меҳмонлар мураббийи Хагоба Аррасете ўйиндан олдинги фикрлари билан ўртоқлашди.

«Умид қиламанки, жамоа яхши ўйин кўрсатади ва Мессига қийинчиликлар туғдира олади. У дунёнинг энг яхши футболчиси ҳисобланади ва Мессининг арсеналида кўп усуллар мавжуд. Кийиниш хонасида уни тўхтатиш керак деб доскага чизиб қўйиш осон, лекин буни майдонда амалга ошириш жуда қийин.

Мавсумни яхши бошладик, лекин ҳозир оптимал спорт формасида эмасмиз. Ҳимоямиздан нолимайман, аммо ҳужум чизиғини ҳам кучайтиришимиз керак.

«Камп Ноу»да тўпни назорат қила олишимизни кўрсатишимиз керак. Биз мағлубият учун майдонга тушмаймиз. Ўз ўйинимизни кўрсата олсак, керакли натижага эришамиз»,- дейди мураббий.

Шуни ҳам таъкидлаш жоизки, ўйин бугун Тошкент вақти билан 23:00да бошланади.