Суперлига 20-тур доирасида бўлиб ўтган «Сўғдиёна» — «Машъал» учрашувидан сўнг меҳмонлар бош мураббийи Улуғбек Бақоев матбуот анжуманида иштирок этди.

— Биз бугунги учрашув стратегик жиҳатдан жуда муҳим ва керакли эканини билардик. Йигитларни фақат ғалабага тайёрлаган эдик. Ўйинга келадиган бўлсак, тезкор гол урдик. Кейин эса маълум вақт, тахминан 20 дақиқалар давомида «Машъал» жамоаси тўлиқ ўйинга киришиб, агрессив ҳаракат қилди ва кўплаб хавфли вазиятлар яратди. Назаримда, улар 3–4 та тўп киритиши ҳам мумкин эди. Бироқ ҳимояда йигитлар вазифасини уддалади, дарвозабон ҳам ажойиб ўйнади. Кейин биз яна иккита гол урдик, сўнг тўп ўтказиб юбордик. Лекин умуман олганда, бугунги ғалабага тўла лойиқ эдик. Йигитларга ўйинга борини бергани ва кўрсатган ўйини учун миннатдорчилик билдираман. Энди навбатдаги баҳсга тайёргарлик кўрамиз.

— Бугун йирик ҳисоб қайд этилди. Ўйин воқеалари бундай ривожланишини кутганмидингиз?

— Бундай ўйинни ҳеч қачон олдиндан башорат қила олмайсиз. Чунки футбол олдиндан айтиб бўлмайдиган ўйин: у ижобий томонга ҳам, салбий томонга ҳам бурилиб кетиши мумкин. Шу боис яратилган вазиятларнинг аксариятидан унумли фойдаланганимиз ҳам ҳужумда, ҳам ҳимояда ўйинимизни анча енгиллаштирди.

«Сўғдиёна» матбуот хизмати