“ПСЖ” бош мураббийи Луис Энрике жамоанинг янги мавсумни омадсиз бошлаганидан хавотирда эмаслигини билдирди.

Париж клуби Франция чемпионатининг дастлабки учта учрашувида ғалаба қозона олмади. “Монако”га қарши сўнгги баҳсда 1:2 ҳисобида мағлубиятга учраган “ПСЖ” мавсумни сўнгги 19 йилдаги энг ёмон старт билан бошлади.

Шунга қарамай, испаниялик мутахассис жамоа ўйинидан хавотирланишга асос йўқлигини таъкидлади.

“Хавотирланишга ҳеч қандай сабаб йўқ. “Монако” дарвозамиз томон нечта аниқ зарба йўллади? Иккита. Нечта гол урди? Иккита. Мавсум охирида вазият қандай бўлишини кўрамиз”, дейди Энрике.

Мураббийнинг фикрича, фақат натижага қараб хулоса қилиш тўғри эмас. Унинг таъкидлашича, “ПСЖ” “Монако”га қарши учрашувда юқори прессингли ўйинни яхши ташкил қилган, бироқ жамоага омад етишмаган.

“Агар “Монако” бизга қарши шундай услубда 10 марта ўйнаса, саккизта учрашувда биз ғалаба қозонамиз, биттасида дуранг қайд этилади ва фақат бирида мағлуб бўламиз. Бу айнан ўша мағлубият бўлди”, дейди испаниялик мутахассис.

“ПСЖ” уч турдан сўнг бор-йўғи икки очко жамғарган ва пешқадамдан етти очкога ортда қолмоқда. Бу парижликларнинг 2007/08-йилги мавсумдан бери чемпионатдаги энг омадсиз старти ҳисобланади.

Луис Энрике жамоа юзага келган фарқни имкон қадар тезроқ қисқартиришга ҳаракат қилишини айтди.

Маълумот ўрнида, 56 ёшли Луис Энрике 2023-йилдан буён “ПСЖ”ни бошқариб келмоқда. У Париж клуби билан уч марта Франция чемпионати, уч марта Франция Суперкубоги, шунингдек, икки марта мамлакат кубогида зафар қучган. Бундан ташқари, испаниялик мутахассис икки марта Европа Чемпионлар Лигаси, икки марта Европа Суперкубоги ҳамда бир марта FIFA Қитъалараро Кубогини қўлга киритган.

“ПСЖ” 9 сентябрь куни Чемпионлар лигасининг навбатдаги мавсумидаги илк учрашувда “Слован Братислава”ни ўз уйида қабул қилади.