Профессионал бокснинг супер ярим ўрта вазн тоифасида ҳаракат қилаётган Исроил Мадримов “Дарё” нашрига берган интервьюсида сўнгги жангидан кейинги ҳолати, рейтингдаги ўрни ҳамда келажакдаги режалари ҳақида батафсил тўхталиб ўтди.

Ўзбекистонлик чарм қўлқоп устасининг таъкидлашича, ҳозирги вақтда у нуфузли бокс ташкилотларининг барча рейтингларида кучли ўнликдан жой олган. Хусусан, IBF (Халқаро бокс федерацияси) йўналишида 2-ўринни банд этиб турган бўлса, қолган йўналишларда ҳам юқори поғоналарда бормоқда. Мадримовнинг сўзларига кўра, бу кўрсаткичлар унга келгусида яна Жаҳон чемпионлиги камари учун рингга кўтарилиш имконини беради.

“Сўнгги жангдан бери етти ой ўтди. Бироқ бу вақт оралиғида тушкунликка тушмасдан, машғулотларни қизғин давом эттиряпмиз. Ҳозирда вазн тоифамиздаги амалдаги чемпионлар ўзаро куч синашмоқда. Уларнинг жанглари якунлангач, ғолибга қарши катта тўқнашув ўтказилиши режалаштирилган. Аввалги баҳсдан тўлиқ тикланиб, керакли хулосаларни чиқариб олдик. Асосий мақсад — буёғига фақат энг кучлиларга қарши йирик жангларда иштирок этиш”, дейди боксчи.