Professional boksning super yarim o‘rta vazn toifasida harakat qilayotgan Isroil Madrimov “Daryo” nashriga bergan intervyusida so‘nggi jangidan keyingi holati, reytingdagi o‘rni hamda kelajakdagi rejalari haqida batafsil to‘xtalib o‘tdi.

O‘zbekistonlik charm qo‘lqop ustasining ta’kidlashicha, hozirgi vaqtda u nufuzli boks tashkilotlarining barcha reytinglarida kuchli o‘nlikdan joy olgan. Xususan, IBF (Xalqaro boks federasiyasi) yo‘nalishida 2-o‘rinni band etib turgan bo‘lsa, qolgan yo‘nalishlarda ham yuqori pog‘onalarda bormoqda. Madrimovning so‘zlariga ko‘ra, bu ko‘rsatkichlar unga kelgusida yana Jahon chempionligi kamari uchun ringga ko‘tarilish imkonini beradi.

“So‘nggi jangdan beri yetti oy o‘tdi. Biroq bu vaqt oralig‘ida tushkunlikka tushmasdan, mashg‘ulotlarni qizg‘in davom ettiryapmiz. Hozirda vazn toifamizdagi amaldagi chempionlar o‘zaro kuch sinashmoqda. Ularning janglari yakunlangach, g‘olibga qarshi katta to‘qnashuv o‘tkazilishi rejalashtirilgan. Avvalgi bahsdan to‘liq tiklanib, kerakli xulosalarni chiqarib oldik. Asosiy maqsad — buyog‘iga faqat eng kuchlilarga qarshi yirik janglarda ishtirok etish”, deydi bokschi.