Марокаш футбол федерацияси президенти Фаузи Лекжаа 2030 йилги жаҳон чемпионати финали Марокашда ўтказилиши эҳтимоли ҳақида яна бир бор фикр билдирди. Унинг таъкидлашича, мамлакат турнирнинг ҳал қилувчи ўйинини қабул қилиш учун етарли асос ва ҳуқуққа эга.
Аввалроқ Лекжаа Бенслиман вилояти 2030 йилги жаҳон чемпионати финалига мезбонлик қилиш шарафига эга бўлишини айтган ва бу баёнот катта муҳокамаларга сабаб бўлганди. Шундан сўнг FIFA финал ўтказиладиган жой ҳали танланмаганини маълум қилган.
Jeune Afrique нашрига берган интервьюсида Лекжаа Марокаш расмий жараёнларга тўлиқ риоя қилаётганини, бироқ финални қабул қилиш ҳуқуқини ҳимоя қилиш ниятида эканини билдирди.
«Бу масала, эҳтимол, испанияликлар томонидан жуда қаттиқ баҳс қилинаётгандир. Марокаш эса ўз қадриятларига содиқ ҳолда ҳеч қачон финал ҳақида гапирмаган. Биз жараёнларга амал қиламиз, тартиб-қоидалар ва регламентни ҳурмат қиламиз», — деди у.
Лекжаанинг таъкидлашича, Марокаш 2030 йилги жаҳон чемпионатини Испания ва Португалия билан рақобат сифатида эмас, балки Африка қитъасини Европа билан биргаликда намоён этиш имконияти деб билади.
«Биз бошиданоқ тушунтирганимиздек, Марокаш Африкани ифодалайди. Демак, биз Испания ва Португалия вакиллик қилаётган Европа билан ёнма-ён турган қитъамиз. Биз ўзаро рақобатга берилган учта мамлакат эмасмиз. Биз цивилизация, маданият ва бошқа йўналишларда бир-бирини тўлдирувчи ёндашувлар устида ишлаяпмиз», — деди Лекжаа.
Шу билан бирга, Марокаш футбол федерацияси раҳбари финал мезбонини аниқлаш вақти келганда мамлакат ўз манфаатларини ҳимоя қилишда давом этишини ҳам очиқ айтди.
«Биз Африка ва Марокаш Қироллигининг ҳуқуқларини ҳимоя қилиш учун доимо шу ерда бўламиз. Менимча, Марокаш бир аср ичида иккинчи марта жаҳон чемпионати финалига мезбонлик қилиш ҳуқуқига эга», — дея қўшимча қилди Лекжаа.
2030 йилги жаҳон чемпионати Марокаш, Испания ва Португалия томонидан биргаликда ўтказилади. Айни пайтда учала мамлакат ҳам турнирга тайёргарлик ишларини давом эттирмоқда.
