«Интер» ярим ҳимоячиси Ҳакан Чалҳанўғлининг «Удинезе»га қарши ўйинда майдонга тушмаганига сабаб маълум бўлди.

Милан клуби Италия А Серияси доирасидаги уй учрашувида «Удинезе» устидан 5:3 ҳисобида иродали ғалабага эришди. Туркиялик ярим ҳимоячи эса ушбу баҳсни ўтказиб юборди.

Инсайдер Николо Скиранинг маълум қилишича, Чалҳанўғли мушак жароҳати сабаб майдонга тушмаган. Футболчи яқин кунларда тиббий кўрикдан ўтади ва шундан сўнг унинг жароҳати қай даражада жиддий экани аниқ бўлади.

32 ёшли ярим ҳимоячи жорий мавсумда Италия чемпионатида 3 та учрашувда иштирок этиб, 2 та гол урди.

Айни пайтда «Интер» 12 очко билан А Серия турнир жадвалида иккинчи ўринни эгаллаб турибди.