Криштиану Роналду ва «Милан» эгаси Жерри Кардинале «Ан-Наср» клубининг эгаларига айланиши мумкин.

Sportitalia хабарига кўра, RedBird консорциуми раҳбари Жерри Кардинале келажакда кенгайиш имкониятига эга бўлган футбол франшизасини яратиш вариантини кўриб чиқмоқда.

Манба таъкидлашича, Кардинале воситачилар орқали «Ан-Наср» билан дастлабки алоқаларни ҳам ўрнатган. Бироқ ҳозирча эҳтимолий келишув мураккаб жараён сифатида баҳоланмоқда.

Шунингдек, RedBird назорат пакетига эгалик қилувчи «Тулуза» билан «Милан» ўртасидаги алоқалар ҳам тобора кенгайиб бораётгани қайд этилган.

A Bola нашри журналист Наваф Ал-Тамимига таяниб хабар беришича, Саудия Арабистони Суверен жамғармаси — PIF'дан «Ан-Наср»нинг назорат пакетини сотиб олишни истаган инвесторлар гуруҳи таркибига Криштиану Роналду ҳам кирган.

Ундан ташқари, лойиҳада Жерри Кардинале ҳамда саудиялик уч нафар бизнесмен — Иброҳим Ал-Муҳайдиб, Муҳаммад Ал-Хурайжи ва Шараф Ал-Ҳаририй иштирок этиши мумкин.

Манба маълумотига кўра, RedBird вакиллари яқин икки кун ичида PIF раҳбарияти билан шошилинч учрашув ўтказади. Мазкур музокара эҳтимолий битим тақдири учун ҳал қилувчи аҳамият касб этиши кутилмоқда.

Режага мувофиқ, консорциумнинг беш нафар иштирокчисидан ҳар бири камида 100 миллион доллар, яъни тахминан 92 миллион евро миқдорида сармоя киритиши лозим.