Ўзбекистон Кубоги 1/8 финали доирасида "Андижон" ва "Олимпик-MobiUz" ўртасидаги қарама-қаршилик кескин кураш остида ўтди.
"Бобур Арена"да кечган учрашувда мезбонлар биринчи бўлимда ҳисобни очишди. 43-дақиқада Имеда Ашортиа Дамир Темиров узатмасидан сўнг рақиб дарвозасини ишғол қилди.
Танаффусдан кейин "Андижон" устунлигини янада оширди. 47-дақиқада Рустам Турдимуродов Бекзод Сулаймонов пасидан кейин ҳисобни 2:0 кўринишига келтирди.
Бироқ "Олимпик-MobiUz" таслим бўлмади. 52-дақиқада Равшанбек Абдуманнонов, 57-дақиқада эса Далер Тухсанов томонидан киритилган голлар ҳисобни тенглаштирди — 2:2.
Қолган вақтда жамоалар ғалаба голини кирита олмади ва учрашув тақдири пенальтилар сериясида ҳал бўлди. Унда "Андижон" футболчилари аниқроқ ҳаракат қилиб, 5:4 ҳисобида устун келди.
Шу тариқа, "Андижон" Ўзбекистон Кубогининг чорак финал йўлланмасини қўлга киритди.
