“Манчестер Юнайтед” клуби раҳбарияти Англия Премьер Лигасидаги (АПЛ) қониқарсиз натижаларга қарамай, жамоа бош мураббийи Майкл Керрикни ўз лавозимида қолдиришга қарор қилди.

Инсайдер Фабрицио Романонинг хабар беришича, инглиз клуби мутасаддилари 45 ёшли мутахассис жамоа билан муваффақиятга эришишига ҳамон ишонмоқда. Шу сабабли унинг истеъфоси ҳақида гап бўлиши мумкин эмас. Раҳбарият хотиржамликни сақлаб, Керрик ва унинг лойиҳасига тўлиқ ишонишда давом этмоқчи.

Маълумот учун, йанвар ойида жамоа рулини ўз қўлига олган Керрик “Манчестер Юнайтед” билан Англия Премьер Лигаси бронза медалларига эга чиқди ва Чемпионлар Лигаси йўлланмасини қўлга киритди.

Бироқ янги мавсум старти манкунианликлар учун омадсиз кечди. Жамоа дастлабки тўрт турда атиги 4 очко (1 ғалаба, 1 дуранг, 2 мағлубият) жамғариб, турнир жадвалида 13-поғонани эгаллаб турибди. Манчестер дербисидаги мағлубият вазиятни янада оғирлаштирди: 23-дақиқадаёқ “Сити” футболчиси четлатилганига қарамай, “қизил иблислар” тайёр сон устунлигидан фойдалана олмади ва 0:1 ҳисобида ютқазиб қўйди.

Манкунианликлар навбатдаги учрашувини 17 сентябрга ўтар кечаси Англия Лига Кубоги 3-босқичи доирасида “Брайтон”га қарши ўтказади. АПЛ 5-тури доирасидаги “Фулҳэм”га қарши баҳс эса 20 сентябрга белгиланган.