«Реал» дарвозабони Тибо Куртуа яқин йилларда футболчилик фаолиятини якунлаш нияти йўқлигини билдирди.

34 ёшли бельгияликнинг мадридликлар билан амалдаги шартномаси келаси йили тугайди. Бироқ томонлар келишувни 2028 йилгача узайтириш бўйича принципиал келишувга эришган.

Куртуа шунингдек, жисмоний ҳолатига ва клубдаги вазифаларига кўпроқ эътибор қаратиш мақсадида Бельгия терма жамоасининг Миллатлар лигасидаги ўйинларида иштирок этмасликка қарор қилган.

Дарвозабон аввалроқ ҳам фаолиятини «Реал»да, клуб афсоналаридан бири сифатида якунлаш истагини билдирган эди.

«Ҳали қарор қилганим йўқ. Асосий жамоа мураббийи бўлишни хоҳлармидим — билмайман. Футболчилар билан ишлаб, жуда тез қариб қолсан керак.

Балким, «Реал»нинг дарвозабонлар бўлимида ишлаш, юқори даражадаги академия яратиш ва тайёр дарвозабон сотиб олиш ўрнига янги Тибо Куртуа тарбиялаб етиштириш қизиқ бўларди.

Аммо ҳозирча яна 5-6 йил футбол ўйнашни истайман», — деди Куртуа.