Англия футбол ассоциацияси (FA) раҳбари ва ФИФА вице-президенти Дебби Хьюитт ФИФА президенти Жанни Инфантинога мактуб йўллаб, жаҳон чемпионатига тегишли айрим тижорий ҳуқуқларни сотиш бўйича амалга ошмай қолган режага доир барча ҳужжатларни ошкор қилишни талаб қилди.
Хьюитт, шунингдек, АҚШ терма жамоаси ҳужумчиси Фоларин Балогуннинг ЖЧ-2026даги дисквалификацияси бекор қилингани юзасидан ФИФА кенгашига ёзма тушунтириш тақдим этилиши кераклигини билдирди.
Инфантино барча тегишли ҳужжатларни ФИФА кенгашининг 15 октябрь куни бўлиб ўтадиган навбатдаги йиғилишига қадар тақдим этиши лозим.
Мактуб нусхаси ФИФА бош котиби Маттиас Графстрёмга ҳам юборилган. Унда ташкилот раҳбарияти фаолияти танқид қилиниб, бошқарув тизимидаги камчиликлар ва жаҳон футболи бош ташкилотида корпоратив маданият билан боғлиқ инқироз мавжудлиги қайд этилган.
Бундан ташқари, Хьюитт FIFA Forward Enterprise (FFE) лойиҳаси ким томонидан ва қандай ишлаб чиқилгани, шунингдек, хусусий инвестицияларни жалб қилиш бўйича тендер жараёни қандай ўтказилганини мустақил текширишни талаб қилмоқда.
FIFA Forward Enterprise лойиҳаси ФИФА мусобақалари, жумладан жаҳон чемпионатининг тижорий ҳуқуқларидаги муайян улушни хусусий инвесторларга сотишни назарда тутган эди.
Бироқ футбол ташкилотлари томонидан билдирилган кескин танқидлардан сўнг ушбу ғоядан воз кечилган.
